Lo collègi mudèt a la dintrada de 2013 dins de locals renovats d’a fons mercés a l’ajuda del Conselh general d’Erau. Aqueles locals ofrisson mai d’espaci, un internat confortable e una sala d’espòrt per respondre als nòstres besonhs creissents. Los collegians dispausan d’un membre de cors pròpri a cada classa ; als professors de venir cap a n’eles. De talhièrs s’organizan dins los temps liures.
Pedagogia
Nòstre collègi practica las tecnicas Freinet e s’apuèja sus la Pedagogia Institutionala per permetre a cada escolan d’espelir en tot respectar sa personalitat.
La pedagogia Calandreta es una pedagogia activa que dona la paraula a l’enfant. Encoratja a venir autonòm, respècta lo ritme d’aprendissatge de cada escolan e estructura la vida de grop per de règlas causidas amassa.
Cada classa emplega regularament d’aisinas pedagogicas adaptadas a lors besonhs, talas coma lo Conselh, lo Qué de nòu, la correspondéncia amb d’autres establiments, lo trabalh cooperatiu, l’auto-avaloracion, los talhièrs descantonats. Amb d’efectius redusits, nòstre collègi pòt ofrir un seguit personalizat a cada collegian e li portar l’atencion que se merita. Los professors seguisson los escolans long de l’escolaritat tota, de la 6ena a la 3ena.
En mai del programa de l’Educacion Nacionala, ofrissèm de cors especifics coma :
- corses de familhas de lengas en 6ena , que dubrís cap a las lengas romanas
- corses de chineses
- Iniciacion al latin en 5ena
- cors de SVT prepausats en espanhòl en 3ena
Los Talhièrs
La tòca dels talhièrs es de balhar l’escasença als collegians de far activitats fòra classa. Talhièrs menats amb d’adultes son prepausats, mas çò que nos agrada lo mai d’endralhar son talhièrs creats e menats pels collegians eles meteisses. Los talhièrs son de totas menas: del bricolatge a la dansa, a las arts, als jòcs de societats en passar per la numismatica.
Internat
Aculhissèm d’escolans del Lengadòc-Rossilhon tot. Avèm un internat d’una capacitat d’un cinquantenat de mainatges. Nòstras setmanas s’organizan en 4 jorns (diluns, dimars, dijòus, divendres). Los intèrnes passan 2 nuèches per setmana a l’internat (diluns e dijòus de ser) e tornan en cò seu lo dimars de ser per passar lo dimècres a l’ostal.
Informacions practicas
L’inscripcion al Collègi es gratuita, pasmens demandam als parents d’aderir a l’associacion. Los corses se debanan diluns, dimars, dijòus, divendres de 8h30 a 12h35 e de 13h50 a 17h10. Lo calendièr escolar seguís lo de l’Educacion Nacionala per l’Acadèmia de Montpelhièr. Un servici de cantina es prepausat al dintre del collègi. Los repaisses son aprestats per un prestatari exterior mentre que lo servici, la susvelhança e l’animacion son assegurats per nòstre personal.