Collègi Leon Còrdas

COLLÈGI CALANDRETA LEON CORDAS, ENSENHAMENT BILINGüE FRANCÉS/OCCITAN, MONTPELLIER (ou LO CLAPÀS) FRANÇA


Quina escòla pels nòstres enfants ?

Sèm lo solet collègi calandreta de la Region Lengadòc-Rossilhon.

Un collègi dobèrt sul monde mercés al bilinguisme e a la pedagogia activa.

Creat en 1997, lo collègi s’inscriu dins la continuitat pedagogica del movement Calandreta. Lo collègi es en contracte d’associacion amb l'Estat e seguís lo programa de l’Educacion Nacionala. Son especificitat es la descobèrta de la cultura regionala e l’aprendissatge de la lenga occitana. Aquel aprendissatge se fa en immersion. Lo collègi s’apuèja sus las practicas pedagogicas eissidas del movement de Celestin Freinet e de la Pedagogia Institucionala que favorizan la presa de responsabilitat dels collegians.

Grop palanca

Lo collègi a la volontat de se dobrir als mainatges que posquèron pas integrar una Calandreta en primari. Per aquò far organizam una còla de novelaris que reçaup ajuda dels altres collegians que paissèlan.

Organizam corses d'apregondiment de la lenga occitana. L'experiénça fa pròba que mainatges capitan d'integrar lo collègi en camin e qu'arriban de bailejar la lenga e las practicas nòstras coma cal. L'important dins la capitada d'aquel projècte, es d'explicar coma se deu al cada novelari los enjòcs, las dificultats, lo vam,... e aital qu'el meteis se pòsca far una causida de s'endralhar o pas sul camin.

 

Leon Còrdas

Portam lo nom d'aquel poëta nòstre. Al collègi avèm lo bonur e l'astre de servar libres de sa bibliotèca que la familha de Leon nos porgiguèt e los mercejam grandament. Los collègians pòdon tocar e veire los libres notats corregits de la man de Leon.